نستكمل بقية بوستات موضوع التوثيق تحت عنوان #وثقها_خطوة_بخطوة
ببساطة البوست دا هيكون تقني أكثر مهو عملي ودا هوضحه ان شاء الله يعني ايه بالظبط.
بعد ما الشهادة بياناتها مظبوطه واتأكدت منها وبقا عليها ختم الإدارة التعليمية دلوقتي جه دور مثلث الاختام المهم اللي هو: (الخارجية – الملحق الثقافي – السفارة/ القنصلية)
ومن هنا حضرتك مخيّر بين تكمل توثيقك في مصر أو السعودية والأمر دا راجع ليك بنسبة 100%
طيب هيجي في بالك سؤال منطقي جدًا وهو هل فيه فرق بين هنا وهناك؟
ببساطة شديدة مفيش فرق يا صديقي لإنه كله واحد أصلًا والمهم يكون الـ ٣ أختام دول موجودين بغض النظر هم من فين
بس يمكن الفرق الوحيد اللي تعرفه وهو إن التوثيق في السعودية -> أغلى (من حيث فرق العملة) وأسرع وسلس
لكن في مصر -> أرخص (من حيث فرق العملة) وبياخد وقت وممل
بمعنى إنك في السعودية ممكن تخلص كل توثيقاتك في مشوار واحد من غير بهدلة كتير دا في حالة كنت في الرياض او جدة او الاماكن القريبة منهم عشان متواجد فيهم مقر الملحق الثقافي المصري والسفارة المصرية، لكن لو في مكان بعيد عنهم هتضطر انك تاخد مشوار او تديهم لمكتب حسب ظروفك.
عكس لو كنت في مصر مش هتعرف تعمل غير ختم الخارجية المصرية بس لكن السفارة والملحق السعودي بيكون التعامل معاهم عن طريق مكتب فقط مش بأشخاص.
بس هنا فيه تريكّاية بسيطة لو عايز تضرب عصفورين بحجر ألا وهي إنه كمل توثيقك في مصر بس خد ختم الخارجية السعودية قبل ما تمشي، طب دا ايه فايدته؟
فايدته إنك لما تروح مصر هتحتاج ختم الخارجية المصرية والسفارة السعودية فقط من غير ختم الملحق الثقافي، طيب دا ليه واشمعنا؟
ببساطة شديدة عشان السفارة السعودية في مصر مش بتختم على أي وثيقة غير لما يكون عليها ختم من الاثنين دول (الخارجية السعودية في السعودية – الملحق الثقافي السعودي في مصر) وبكدا تكون تغلبت على العنصر السيء في مصر وهو الملحق الثقافي السعودي في مصر، ليه؟
عشانه للأسف مواعيد شغله غير منضبطه وبيتأخر، لذلك دا هو سبب تأخير الشهادات في مصر لكن كدا إنتَ تغلبت على النقطة دي وهتلاقي الشهاده بدل ما كانت هتوصلك بعد شهر او أزيد هتوصلك في اقل من ٥ ايام ان شاء الله حسب المكتب اللي هتوديه ليه (وانتظروا مفاجآتنا بخصوص الموضوع ده 
)
يبقى تعالى نلخص الكلام دا عبارة عن ايه
في حالة هتوثق من السعودية:
ختم الخارجية السعودي + ختم الملحق الثقافي المصري في السعودية + ختم السفارة/ القنصلية المصرية في السعودية
في حالة هتوثق من مصر:
قدامك طريق من الاثنين:
توثق كله من مصر وبكدا هتحتاج: ختم الخارجية المصرية + ختم الملحق الثقافي السعودي في مصر + ختم السفارة/القنصلية السعودية في مصر. (بس خلي بالك الشهادة هتتأخر)
توثق بطريقة مختصرة وبكدا هتحتاج: ختم الخارجية السعودية في السعودية + ختم الخارجية المصرية في مصر + ختم السفارة/القنصلية السعودية في مصر. (وكدا هتختصر وقت وفلوس)
وحط في جيبك المعلومة دي إنك لو وثقت في السعودية كل اختامك فيه بعض الجامعات الخاصة بتحتاج ختم الخارجية المصرية زيادة على الشهادة فـ تبقى اقرأ كويس متطلبات التقديم، لكن في الحكومي مش محتاج دا خالص.
دا كان البوست الثاني، وانتظرونا البوستات الجاية بنشرح ونوضح كل خطوه بتتم ازاي واللينكات والأسعار بس كان لازم تعرف إنتَ داخل على ايه بالظبط عشان تبقى مهندل دنيتك، دمتم بخير 
0 Comments