وثقها خطوة ب خطوة (الخطوة الرابعة)

هلا وغلا حيّاكم الله يشوباب

زي ما وضحنالكم خطوات التوثيق للناس اللي هتوثق في السعودية، على الجانب الثاني هنوضح للناس اللي هتوثق في أم الدنيا بلادي بلادي لكِ حبي وفؤادي

بدايةً زي ما اتفقنا إنه عشان تكمل توثيقاتك في مصر لازم الشهادة بتاعتك يكون عليها ختم الإدارة التعليمية.

طيب تمام كله موجود اعمل ايه؟

زي ما وضحنا في البوست الثاني من السلسلة هم نفس الأختام الثلاثة بس باختلاف المسميات بمعنى بدل ما هتوثق من السفارة المصرية في السعودية، هتوثق من السفارة السعودية في مصر وهكذا..

الترتيب دا في الأختام مهم يشباب.

بدايةً هتروح تصدق الشهادة بتاعتك من الخارجية المصرية!

بس خد بالك إنتَ مش بتروح الخارجية نفسها، إنتَ بتروح مكان اسمه مكتب تصديقات وزارة الخارجية.

ودا موجود في كل محافظة غالبًا وإن لم تجد بتشوف أقرب فرع ليك وتروحه ببساطة، هتقلهم عايز ختم توثيق شهادة ثانوية وتستنى دورك وتخلص أمورك (الدنيا هتكون حر وهتقف في طابور عشان تسلم وطابور عشان تستلم وممكن تتأخر عشان اللي بيختمها مندوب مخصص معاه الختم مش زي بقية الناس اللي موجودين أغلبهم بيختموا شهادات ميلاد وهكذا)

الختم سعره كام للأسف صراحةً معندناش علم لإن الأسعار بتزيد من وقت للثاني بس مظنش هيعدي الـ ١٥٠ج.

بعدها تروح الملحق الثقافي وهو ليه فرع واحد موجود في القاهره ودا رابط الفرع:

الملحقية الثقافية السعودية

‏https://maps.app.goo.gl/PnjnjYHmGACsu5fX6

“غالبًا هتلاقيه قافل أغلب الوقت”.

بعدها هتحتاج ختم السفارة (القنصلية) السعودية في مصر

وهنا نيجي لنقطة مهمة ألا وهي إن السفارة السعودية في مصر مش بتتعامل مع أفراد!!!

يعني ايه الكلام دا؟

زي ما بقلك كدا يا صديقي العزيز، السفارة السعودية بتتعامل مع مكاتب بس يعني لو حضرتك رحت كدا زي في السعودية هيردوك!

وهنا نيجي لنقطة أهم يا صديقي الخريج اللي تاه مني وشاف الدنيا قفلت في وشه مره وحده كدا عشان قرر يكمل أختامه في مصر

عشان تاخد ختم الملحقية والسفارة هتودي شهادتك لمكتب توثيق يخلصلك الموضوع دا وتريّح نفسك لإن الموضوع صعب ومش هتدخل للأسف!

(بالمناسبة المكتب ممكن يجيبلك الثلاث اختام عادي بما فيهم الخارجية بس لو عندك وقت وحابب تروح بنفسك دي حاجة ترجعلك عادي)

والمكاتب في مصر بتاخد في حدود ١٠ لـ ١٤ يوم عمل وممكن أكثر وتوصل لشهر! وبعدها تاخد شهادتك متوثقة (وزي ما وضحنا قبل كدا إن سبب التأخير بيكون بسبب الملحق الثقافي، لكن ممكن تستبدل دا بخطوه بسيطة إنك تاخد ختم الخارجية السعودية قبل ما تنزل عشان تكسب وقت)، وبيطلبوا منك صورة الإقامة فـ اعمل حسابك.

وبخصوص الفلوس فـ بتختلف على حسب المكتب وهو في أي محافظة وهكذا يعني…

وعلى سيرة المكاتب وكدا انتظرونا في حاجة قريبة بخصوص الموضوع دا عشان نساعدكم ونوفر عليكم

وبسكدا يا صديقي العزيز مُبارك لك مرة تانية، وبالتوفيق يا رب

دي كانت سلسلة #وثقها_خطوة_بخطوة وإن شاء الله نكون ألمّينا كل حاجة تخصها، انتظروا الفايل اللي فيه خلاصة السلسلة دي وفيديو شرح توضيح الخطوات، فالكم التوفيق وانتظرونا فيما قبل التنسيق