وثقها خطوة ب خطوة (الخطوة الأولى)

بسم الله نبدأ سلسلة #وثقها_خطوة_بخطوة فـ طوّل بالك واقرأ بتركيز عشان زي ما بنقول بالعامية كدا الغلطة هنا بفورة وأي تعديل بعد كدا بيكون صعب فـ خليك زي ما الكتاب بيقول؛ لأن أغلب المشاكل اللي بتحصل بعد كدا بتكون هي دي مشكلتها وتعديلها متأخر بياخد وقت وبيكون متعب جدًا.

بدايةً لازم تكون البيانات الخاصة بيك صحيحة تمامًا ومطابقه بالحرف، ولازم تتأكد من الاسم ورقم الجواز والهويه وتاريخ الميلاد وكل حاجه، متحرمش نفسك من حاجه، خليك في بر الأمان!

نقطة لازم توضح وهي إن الاسم وبياناتك في نظام نور (الشهادة) بتكون اوريدي مطابقه للجواز في كل حاجه – وبياناتك في قياس بتكون مطابقه للإقامة

وخلي بالك من نقطة إن الاسم في قياس بيكون رباعي شبه الإقامه، بعكس الشهاده والجواز اللي بيكون الاسم كاملًا، دي مش غلطه ولا حاجه دا سستم الدوله كدا.

لازم تكون بياناتك في الشهادة مطابقة للجواز، وقياس مطابقة للإقامة، وياريت يعني ولازم يكون كلهم مطابقين للجواز لأن دا الحاجه الرسمية اللي صادره ليك في مصر وأوقات في مصر بيتلككوا على أي حاجه، فـ خليك في المضمون

متنساش وأفكرك تاني المعادلة بتقول ايه؟

شهادة المدرسة = الجواز – قياس = الإقامة

اتأكدوا إن بياناتكم كلها مظبوطه يا شباب ومطابقه بالحرف عشان متندموش بعدين، فيه متسع من الوقت وتقدروا تظبطوا أموركم قبل ما الترم يخلص، لإن دي أهم حاجه في الفتره دي.

قبل ما نكمل أي حاجة ضروري جدًا تعرف إن الشهادة اللي هيكون عليها كل الأختام، هي شهادة الإشعار الأكاديمي اللي فيها الـ 9 مستويات اللي درستهم خلال مرحلتك الثانوية (9 مستويات دول اللي هم 3 ترمات لكل سنة في الثانوية -> 3*3=9).

ودي بتكون شهاده كرتون ودي الأصل اللي هيكون عليها كل الأختام، وبتستلم معاها كم نسخة طبق الأصل تحسبًا لأي حاجة لكن طبق الأصل دول مش بيتختموا ولاهم يحزنون

وبلاش تستذكى وتقول هطلع كم وحده أصل وأوثقهم كلهم، خساره فلوس وحاجة ملهاش داعي عمومًا.

طيب الشهادة دي هتوصلك ازاي؟

فيه نظام جديد اتطبق على نسبة كبيرة من المدارس وهي ان الشهادة هتطلبها من موقع اسمه *نتائجي* وبتروح تستلمها من ادارة التعليم التابعه للمنطقه التعليمية بتاعتك مختومه بختم واحد من الاثنين دول سواء كان [إدارة التعليم أو إدارة الاختبارات والقبول]

طيب لو كنت من الناس اللي مش مطبق عليها الموضوع دا، فـ هنا عادي يا هتستلمها من المدرسة بالتنسيق معاهم وتوصلك الشهادة عليها (شبه النظام القديم) يا من مكتب التعليم بس خلي بالك إنه ممكن توصلك الشهادة ساده معليهاش اي ختم وهنا لازم تروح بنفسك إداره التعليم التابعه للمنطقه بتاعتك تاخد ختم قسم الاختبارات والقبول هناك.

خد بالك ختم وتوقيع المدرسة / قائد المدرسة مبقاش مطلوب حاليًا وليس ذات أهمية.

دا كان البوست الأول، وتابع الكومنتس هتلاقي اننا حاطين اجابات كم سؤال متداول بين اغلبكم.

وبس كده دُمتم موفقين وانتظرونا غدا في خطوة جديدة من مشوار التوثيق